toki lili pi toki pona
toki lili lon toki pona li pona mute a! mi lukin mute e toki lili la mi kama sona e ni: nasin seme pi toki lili pi pona lon toki pona? mi toki e nasin mute lon lipu ni, e nasin pi kepeken mute anu nasin pi kepeken lili. lipu ni li toki ala e nasin ale pi toki lili, li toki e nasin pi pona mi taso.
nasin pi sitelen pona
toki lili ni li kepeken sitelen pona. jan li ken pana e sitelen lon leko li ken kama e lukin suwi e toki suwi kin. nasin pona la, jan li kepeken sitelen pona pi lukin sama. lukin pi sitelen pona li pana e sona mute pi toki nimi ala, pi lukin sitelen taso.
o sona e ni: nimi "tu" en nimi "sama" li nimi ante lon toki. taso, sitelen pona la, sitelen "tu" en sitelen "sama" li sama mute a! ni li wawa lon nasin nimi leko.
leko nimi
leko nimi li toki lili tan pali mi. sina sitelen e ona lon sitelen pona la ona li lukin sama ni: linja tu tu pi nimi tu tu li lon, li pali e leko pi nimi luka luka luka wan. ken jan ante la sina ken lukin e ona lon sinpin anu supa. mi la, nasin supa taso li pona. suli la, nimi leko o kepeken sitelen pona pi lukin suwi a. nimi mute li ken kin, la ona li ken linja luka pi nimi luka, anu linja tu wan pi nimi luka wan. mi la, linja tu tu pi nimi tu tu li pona. sina sitelen ala e toki lili lon toki pona la sina wile sitelen nanpa wan la, o kepeken nasin ni a!
mi pali e lipu ante tawa leko nimi mi. sina wile la, o lukin!
akesi li wile lon nena
lipu akesi li wile lon nena li lipu tan jan Kita, tawa utala musi pi ma pona. mi sona ala e lili pi lipu ni. taso ona li lipu pona a la mi o toki e ona. lipu ni li jo e linja mute pi nimi luka taso, lon palisa toki suli. lukin la, lipu ni li suwi mute a!
telo tu
lipu telo tu li lipu tan jan Ponta, tawa utala musi pi ma pona. nasin pi toki lili ni li sama leko nimi, li sama lipu akesi li wile lon nena, li sama ni: ona li jo e linja mute pi nimi tu tu. ante la, ona li kulupu e nimi kepeken weka en palisa. kulupu nanpa wan en kulupu nanpa tu li jo e linja luka tu, e weka wan, e linja sin wan. palisa li lon insa kulupu. wawa la, kulupu nanpa wan li jasima pi kulupu nanpa tu, sama ni: linja li open kepeken nimi "wawa" la linja jasima li pini kepeken nimi "wawa." pini la, kulupu nanpa tu wan li lon, li jo e linja tu taso. mi la nasin ni li wawa a!
nasin pi sitelen pona ala
toki lili li ken kepeken sitelen pona ala, kin. ni li pona mute ala tawa mi, taso ona li awen ken li awen musi a!
leko pi nimi lili en leko pi kalama lili
sama leko nimi lon sitelen pona la, leko pi nimi lili en leko pi kalama lili li lon. leko pi nimi lili li pona lon sitelen Lasina, la leko pi kalama lili li pona lon sitelen sitelen. mi la leko pi nimi lili li suwi mute ala, taso ona li awen ken. mi sona ala e sitelen sitelen la mi sona ala e suwi pi leko pi kalama lili.
toki Aku (Haiku)
toki Aku li toki lili tan ma Nijon. ona li kepeken kalama Morae. kalama ni li ken kalama nimi lili anu kalama n. sona la, nimi linja li jo e kalama ni tu wan: li-n-ja. nasin li kepeken linja tu wan pi kalama ni, lon nasin ni: linja nanpa wan en linja nanpa tu wan o jo e kalama luka, la linja nanpa tu o jo e kalama luka tu. ni li sama lili tawa nasin pi sitelen pona tan ni: sina o nanpa e ijo. taso nasin Aku li jo e ijo ante mute kin. sina wile sona e ijo ante la o lukin lon lipu ni: nasin Aku pi toki pona tan jan Pensa (toki Inli).
toki musi jasima (Juxtapoem)
toki musi jasima li toki lili tan jan Mali. ona li jo e lawa kiwen la sina o pana e nimi lon ma ken. sina wile sona mute e ni la o lukin e lipu lon sona pona.
toki lili pi sinpin tu (Double column poem)
mi en kala pona Tonyu li sitelen e lipu ona li monsuta e jan la mi kepeken e nasin ni.